CEBU CITY-Gisusi sa Cebu City Police Office (CCPO) ang firecracker zone sa dakbayan sa Sugbo nga nahimutang sa South Road Properties (SRP), kagahapong adlawa a Biyernes Disyembre 27, 2024.
Kini gipangunahan ni Police Colonel Antonietto Cañete ang City director sa Cebu City Police Office (CCPO) uban ni Police Lieutenant Colonel Jeffrey Bilaro, hepe sa Regional Civil Security Unit sa Central Visayas.
Tumong niini, aron masiguro nga masunod ang safety regulations, lima ka adlaw sa dili pa ang Bag-ong Tuig.
Ang surpresa nga inspeksyon kabahin sa paningkamot sa Police Regional Office sa Central Visayas sa pagpakusog sa mga lakang sa seguridad alang sa kaluwasan sa publiko atol sa busy nga holiday season.
Una na nga nipahigayon og inspeksyon ang City Director sa nagkadaiyang transport ports, terminals, ug firecracker stalls sa Sugbo.
Sa datus sa Regional Civil Security Unit (RCSU 7), ang Central Visayas adunay duha ka awtorisado nga firecracker makers, pito ka mga tigbaligya, ug 602 ka mga retailer.
Sumala sa Executive Order No. 28, series of 2017, ang paggamit sa mga pabuto nahimong kabahin sa tradisyon sa mga Pilipino sa pagsaulog sa mga espesyal nga mga okasyon mahimo nga kini personal, relihiyoso, kultura, ug nasudnong importansya.
Samtang, nisaka ngadto sa 28 ang listahan sa gidili nga mga pabuto, lakip na ang mga bag-ong nadugang nga mga butang sama sa Goodbye Chismosa, Tuna, Pillbox, Kabasi, Hello Columbia, ug Kingkong.
Ang mga retailer nga makit-an nga namaligya og gidili nga mga pabuto mahimong mag-atubang sa pagkumpiska sa ilang mga lisensya, bug-at nga multa ug pagkabilanggo sa unom ka bulan hangtod sa usa ka tuig.
