Nakaandam na ang gilatid nga security deployment sa Cebu City Police Office (CCPO) ug Kagamhanang Dakbayan sa Sugbo para sa umaabot Penitential Walk with Jesus procession sa sayong buntag sa adlawng Huwebes, Enero 8, 2026.
Kini ang gipamahayag ni Police Lt Col. Joe Los Baños, ang tigpamaba sa CCPO atol sa eksklusibong pakighinabi niini sa Bombo Radyo Cebu News Team diin sumala pa sa opisyal nga karong adlawa kay nagplantsa na sila sa security plan and deployment pinaagi sa coordination meeting sa kagamhanang dakbayan.
Gani dugang pa sa opisyal nga duha ka oras sa wala pa ang prosesyon kay naka-standby na ang ilang mga police personnel nga muabot sa 543 ang ihap subay sa routa sa kalihukan diin gawas pa ang mga augmented forces sa Joint Task Group Cebu nga natahasan sa seguridad sa kapistahan.
Samtang sa habig sa Cebu City Government, nahinabi sab sa Bombo Radyo Cebu News Team si Cebu City Councilor Philip Zafra, ang Vice Chairman sa City Council Committee on Public Order and Safety diin namahayag kini nga “all systems go” na ang dakbayan kabahin sa deployment sa kapulisan, disaster personnel, kabumberohan, traffic enforcers, ug mismong ang Basilica Minore del Sto. Niño de Cebu para sa mga religious activities sa Fiesta Señor.
Gipahimangnoan sa opisyal ang publiko ilabi na sa mga motorista sa mga dalan nga gikatakdang ipangsirado sa downtown Cebu City aron malikayan kini nga dili makabalda sa mga byahe.
