Giinsister ni suspended Senate Sergeant-at-Arms Mao Aplasca nga ang CCTV footage nga gipagawas kalabot sa insidente sa pagpamusil sulod sa Senado niadtong Mayo 13, 2026, kay “gi-splice.”
Sa usa ka ambush interview niadtong Miyerkules, si Aplasca miingon nga pinili lang nga mga bahin sa video nga gipagawas aron suportahan ang usa ka partikular nga naratibo.
Matud ni Aplasca nga giandam nila ang kompletong mga video gumikan alang kanila dili kini husto.
Gipasiugda usab niya nga ang mga pangangkon nga walay pag-atake sa Senado, dili tinuod.
Samtang, gilauman na usab ni Aplasca ang posibleng kaso nga ipasaka batok kaniya kalabot sa insidente.
Kini human girekomendar sa Philippine National Police (PNP) ang pagpasaka og mga kaso batok kang Aplasca ug duha pa ka security personnel.
Sumala sa PNP, ang mga nalambigit mahimong mag-atubang og mga paglapas sa Rules of Engagement ug sa mga probisyon sa Republic Act No. 11917 o ang Private Security Services Industry Act.
Ingon man nga gikumpirma usab ni Aplasca nga nakadawat sila og subpoena gikan sa PNP-Criminal Investigation and Detection Group isip kabahin sa nagpadayon nga imbestigasyon.
Bisan pa, iyang gihimakak ang pasangil nga ilang gitagoan ang mga ebidensya sama sa CCTV footage ug mga armas.
Giingon usab ni Aplasca nga adunay security coordination meeting tali sa Office of the Senate Sergeant-at-Arms ug sa GSIS Security Office niadtong Mayo 12, nga giingong pagpangandam alang sa umaabot nga impeachment proceedings.
