CEBU CITY — Gikadismaya sa mayor sa lungsod sa Compostela, probinsiya sa Sugbo, ang wala pagtahud sa KAPA – Community Ministry, Inc. sa iyahang pagpahunung sa mga gihimu nga aktibidad sa organisasyon.
Sa eksklusibo nga pakighinabi sa Bombo Radyo Cebu kang Compostela Mayor Joel Quiño, gihimug-atan niini nga nagpagawas kini ug cease and desist order ug gipabutangan niini ug notice sa gate sa opisina sa KAPA apan giingung gipatangtang kini ni Christopher Abad, ang giila nga lider sa organisasyon sa nahisgutang lungsod.
Matud ni Mayor Quiño nga wala mikuha ug mayor’s permit ug wala usab kini business permit ang KAPA hinungdan nga iyahang gipahunung ang operasyon.
Dugang pa sa mayor nga daku ang iyahang pagtu-u nga usa ka negosyo ug dili ministry ang nahisgutang organisayon gumikan kay giingung wala may religious group nga naglambigit ug dakung kantidad sa salapi ug sigon pa nga walay donasyon nga adunay interes.
Subay niini, nagdesisyon ang opisyal nga mupasaka ug dugang kaso batuk sa KAPA.
Samtang, nagpasalamat usab si Quiño sa Bombo Radyo gumikan sa mga impurmasyon nga iyahang nakuha ug isip mayor sa Compostela hayan iyaha kining magamit sa mas hugut nga pagtutuk niini sa giingung investment scam.
