PROVINCE OF CEBU-Mimando og cease-and-desist order si Cebu Provincial Governor Gwendolyn Garcia sa Apo Land and Quarry Corporation (ALQC) sa paghunong sa tanang “earth-moving operations” sulod sa tanang Mineral Production Sharing Agreement (MPSA) sa dakbayan sa Naga sa habagatang Sugbo sulod sa usa ka buwan nga pagasugdan karong adlawa sa Martes, Disyembre 3, 2024.
Kini pinaagi sa Executive Order No. 22 diin ang ALQC mao ang nag-unang supplier sa CEMEX Philippines sa limestone, clay ug greywacke nga mga raw materials alang sa produksiyon sa semento sa planta niini nga nakabase sa samang habagatang dakbayan sa probinsiya.
Ang MPSA usa ka kasabotan diin ang kagamhanang lalawigan naghatag sa kontraktor sa eksklusibong katungod sa pagpahigayon sa mga operasyon sa pagmina sulod sa usa ka kontrata nga lugar ug bahin sa gross output.
Kini aron ma-regulate ang mga operasyon ug ang mga quarry operators gikinahanglan nga mosunod sa estrikto nga environmental ug safety standards nga gilatid ubos sa Philippine Mining Act of 1995.
Ubos sa samang kamanduan, ang ALQC gimanduan usab sa pagkooperar sa pagpahigayon sa environmental audit, comprehensive area risk assessment, ug ang pagdeterminar sa carrying capacity sa MPSA areas.
Ang EO 22 gi-issue human masayri nga adunay dinalian nga panginahanglan alang sa nahisgutang mga pamaagi tungod kay namatikdan nga ang padayon nga operasyon sa ALQC usa ka “apparent disregard” sa kaluwasan sa mga lumulupyo nga nagpuyo sulod o duol sa nahisgutang mga lugar sa MPSA.
