Gitun-an sa Kagamhanang Lalawigan sa Sugbo ang paghatag pud niini og fuel subsidy sa sektor sa pampulikong transportasyon sa probinsya agig pagtabang sa kalisod mugna sa krisis sa krudo karong panahona.
Kini ang gipamahayag ni Aldwin Empaces, ang Assistant Provincial Administrator sa Cebu Capitol sa eksklusibong pakighinabi niini sa Bombo Radyo Cebu News Team nga matod pa usa kini sa mga aksyon nga gitun-an sa Office of the Governor human nga aduna nay umaabot roll-out nga hinabang ang Department of Energy (DOE) ug Office of the Presidente sa maong sektor.
Gipanglantawan nila nga mahatagan og hinabang ang pormal nga sektor sa pampublikong transportasyon sama sa taxi ug jeepneys. Samtang ang informal sector sama sa mga habal-habal kay gitun-an pa ang pamaagi sa pag-roll out niini.
Posibleng mahatag kini sa musunod nga mga semana sa higayong makasumiter na sa ilang report ang gimugnang Technical Working Team sa Office of the Governor.
Kasayran nga ang DOE ug Office of the President kay maghatag og P3,000 fuel subsidy sa farmers ug fisherfolks ug P5,000 transport groups.
Gipasabot sab sa opisyal nga sa ilang kasamtangang pagtuon, gipanglantawang makahatag ang Kapitolyo sa Sugbo sa P3,000 – P5,000 para sa pampublikong sakayan sa lalawigan.
