CEBU CITY – Andam na ang kagamhanan sa dakbayan alang sa ikatulong hugna sa National Vaccination Days sa buwan sa Pebrero.
Matud ni Dr. Jeffrey Ibones, officer sa Cebu City Health Department, nga tinguha niini nga makabakuna sa 58,000 ka mga indibidwal karong umaabot Peb. 10 ug 11.
Apan, mag-agad kini sa ipadala nga mga bakuna gikan sa kaulohan ug aron makab-ot ang maong tumong, nangayo og tabang si Ibones sa pampubliko ug pribadong mga tambalanan.
Kini gumikan gikinahanglan sa maong kalihokan ang dugang manpower, logistical support, oximeter ug thermometer tungod mao kini ang dali nga maguba.
Himuon sa 35 ka nagkdaiyang lugar sa dakbayan sa Sugbo ang pagpamakuna sulod sa maong duha ka mga adlaw.
Kahinumdoman nga sa unang hugna sa “Bayanihan Bakunahan” niadtong Nob. 29, 2021, moabot sa 2.7 ka milyon ka mga tawo ang nabakunahan, nga nagbutang sa Pilipinas sa ikaupat nga dapit sa mga nasud nga labing daghang nabakunahan sa usa ka adlaw.
Kapin sa 110-mil usab ang nabakunahan ni’ng dakbayan atol sa samang hugna sulod sa lima ka adlaw.
