CEBU – Nagplano ang Cebu City Disaster Council nga maghimo og halapad nga database sa mga residente sa dakbayan aron mas paspas ang pagresponde panahon sa kalamidad.
kini ang gibutyag ni Atty.Gerry Carillo,ang Disaster Council chairperson,nga ang database maglista sa tanang mga residente sa panimalay nga nagpakita kon sila ang tag-iya sa balay, padre de pamilya, renter, sharer, o tenant.
Mao kini ang ilang solusyon sa problema sa pag-apud-apod sa mga hinabang, ilabi na human sa makadaut nga Bagyong Odette diin nitumaw ang mga anomaliya ug kahiwian sa pagpang-apod-apod nga mikabat og unom ka buwan aron mahuman.
Dugang pa,nga ang computerized database makaseguro nga mas paspas ug mas tukma nga pag-ila sa mga residente nga nagpuyo sa lugar ug malikayan ang pagdoble sa pag-apod-apod sa mga hinabang sa kalamidad.
Gipalit na sa kagamhanan sa dakbayan ang software system nga maoy mag-host sa database nga sa dili madugay magamit na sa tanang barangay.
