CEBU CITY-Gibutangang ug ‘water gauges’ o sukdanan sa pagtaas sa lebel sa tubig ang pito ka dagkong agianan sa tubig sa dakbayan sa Sugbo isip pag-amping batok sa pagbaha tungod kay ang La Niña phenomenon gipaabot nga motaas ang uwan sa ikaduhang bahin sa tuig.
Kabahin kini sa pagpangandam sa Cebu City Disaster Risk Reduction and Management Office (CCDRRMO) alang sa La Niña, nga giingon sa state weather bureau nga moabot sa Hulyo ug mahimong magpadayon hangtod sa Agosto o Septiyembre taliwala sa nagpabiling epekto sa huyang nga El Niño episode.
Ang mga dagkong agianan sa tubig sa dakbayan mao ang Bulacao River, Tagunol Waterway, Kinalumsan River, Guadalupe River, Estero de Parian, Lahug River ug Mahiga Creek.
Dugang pa, nga gilatid usab ang daghang mga lakang aron makunhuran ang mga peligro nga gipahinabo sa La Niña.
Gawas sa pagbutang og ‘water gauge’ sa pito ka dagkong suba sa dakbayan alang sa monitoring purposes, ang CCDRRMO nagbutang usab ug early warning signs sa landslide- ug flood-prone areas.
Nag-apod-apod usab ang buhatan og information materials mahitungod sa kapeligrohan sa pagbaha ug pagdahili sa yuta ngadto sa mga barangay.
