Cebu City-Subli na usab nga nalangkat sa Cebu City Division ang kampeonato sa 2018 Central Visayas Regional Athletic Association Meet CVRAA sa ika 26 na karon ka sunud-sunud nga higayon.
Sa kinatibuk-an nakakuha ug 114 ka gold, 69 ka silver ug 80 ka bronze medal ang Cebu City Division, gisundan kini sa probinsya sa Bohol nga dunay 47 ka gold, 44 ka silver ug 71 ka bronze, ikatulo ang Lapulapu City Division nga dunay 35 ka gold, 31 ka silver, ug 26 ka bronze. Gisundan kini sa Dumaguete nga dunay 28 ka gold, 22 ka silver, 28 ka bronze, naa usab sa ika lima nga pwesto ang Cebu province nga dunay 27 ka gold, 54 ka silver ug 40 ka bronze.Naa sa ika unom ang Mandaue City nga dunay 24 ka gold, 47 ka silver, ug 39 ka bronze.
Gisundan kini sa Tagbilaran City, Negros Oriental, Danao City, Bayawan City, City of Naga, Talisay City, City of Bogo. Toledo City, Carcar City, Tanjay City, Siquijor, Bais City ug Guihulngan City.
Gibutyag ni Dr Beanito Dagatan , ang Cebu City Schools Division Supt. nga dakong tampo sa ilang kalampusan mao ang pagpaningkamot gayud sa ilang mga players diin naa gayud sila sa kondisyon.
Dili usab matud pa lalim ang ilang naagi-an nga mga pagbansay bansay gane bisan naay duwa o wala padayon sila sa ilang training.
Sunud na usab nga pangandaman sa mga nagkampyon karong tuiga mao ang nagsingabot nga Palarong Pambansa 2018 nga ipahigayon sa Vigan sa umaabot nga Abril 16 hangtud 21.///
