CEBU CITY-Human nakadawat og pasidungog sa usa ka international travel platform ang dakbayan sa Sugbo isip Top 2 Asia’s Pet-Friendly City, nanghinaot ang buhatan sa Deparment of Veterinary Medicine and Fisheries (DVMF) nga mahimong rabies-free ang syudad.
Kini ang giasoy ni Dr. Alice Utlang nga gusto niining pakusgan pa ang programa niining “Catch-Neuter-Vaccinate-Return” (CNVR) aron sa pagkab-ot sa ilang tinguhang walay mga binuhing hayop ang adunay hulga sa rabies tibuok dakbayan.
Gihimug-atan sab ni Dr. Utlang ang hinaot niini nga katungod sa mga binuhing hayop ilabi na ang mga libud-suroy nga mabakunahan ug madalitan sa atensyon medical kung magkinahanglan kini.
Dugang pa nga ang pagpang-impound sa mga libud-suroy nga hayop kay dili mao ang solusyon ilabi na nga dili kini sala sa mga mananap apan sa mga kanhi tag-iya niini.
Kahinumduman nga gitanyag ang dakbayan sa Sugbo isip Top 2 Asia’s Pet-Friendly City sunod lang sa Dah Nang, Vietnam sa travel app nga “Agoda” diin dakong makakugang nga kalipay kini sa buhatan sa DVMF nga wala nagdahom sa maong pasidungog.
