CEBU – Naka-red alert status na ang Bureau of Fire Protection (BFP) alang sa umaabot nga Mayo 9 nga piniliay, karung adlaw nga Lunes.
Gipahibalo ni SFO2 Wendell Villanueva, nga anaa sa 145 ka mga on-standby nga personnel ang Cebu City Fire Department, alang sa pag-abag usab sa mga kasundalohan ug kapulisan sa pagbantay sa kahapsay ug kalinaw sa pinili-ay.
Matud ni Villanueva nga gawas sa kahapsay ug kalinaw, nagbantay usab sila alang sa mga vital installations sa kuryente sa matag polling centers, diin ilahang gisiguro nga luwas ang tanan gikan sa sunog.
Hinuon, gibutyag niini nga sa wala pa ning adlawa, una na silang nagpahigayon ug fire safety inspections sa mga polling center sa dakbayan, ingon man ang pipila ka mga seminar alang sa mga electoral boards ug evacuation drill kung ugaling adunay sunog nga mutumaw sa adlaw sa pinili-ay.
