Gibawal na sa Kagamhanang Dakbayan sa Sugbo ang “engine idling” kun pagpadagan sa makina sa sakyanan nga wala nag-abante.
Nanukad kini sa mandato nga gipangunahan ni Cebu City Vice Mayor Tomas “Tommy” Osmeña ug giaprobahan ni Mayor Nestor Archival Sr. niadtong Martes, Marso 10 sa tinguha nga ang tanang empleyado ug personahe sa City Hall nga makadaginot og gasolina ug diesel sa mga sakyanan nga gipanag-iya sa kagamhanan.
Sumala pa sa mandato nga nag-abiso sa mga personahe sa City Hall sa pagpraktis og fuel conservation ilabi karong nagmahal ang presyo sa produktong lana ug sa tinguha sa gobyerno nga makadaginot sa mga resources niini.
Giawhag niini ang tanang buhatan ug departamento sa City Hall nga siguraduhong nakapawng ang makina kung mag-standby lang kini samtang nagpaabot sa lakaw.
Sa mikinsa ang masakpan nga makalapas niini kay mamahimong mag-atubang og silot subay sa lagda sa City Hall.
Kahinumduman nga sa bag-o lang dako ang pagsaka sa presyo sa produktong lana mugna sa kagubot sa Middle East nga nakapanipis sa suplay sa kalibutanong pamatigayon sa petrolyo.
