Gi-aprobahan na ni Cebu City Acting Mayor Raymond Alvin Garcia ang sugyot sa Cebu City Disaster Risk Reduction Management Council (CCDRRMC) sa paghatag og financial assistance sa mga lokalidad nga naigo sa delubyo sa pagbuto sa Bulkang Kanlaon sa Isla sa Negros nga mukantidad sa kinatibuk-an nga Php 7-milyones.
Sa usa ka pamahayag sa Acting Mayor niadtong adlaw sa Lunes, Hunyo 10 sa kasamtangang tuig, gipasar na sa iyang opisina ang maong kamanduan aron mahatod ang hinabang pinasyal ngadto sa nagkadaiyang Local Government Units sa apektadong lugar sa dili pa matapos ang semana.
Gipa-abot nalang niini ang Special Session sa Sangguniang Panlungsod sa kagamhanang dakbayan sa Sugbo aron mapasar kini.
Matud pa sa Acting Mayor sa dakbayan sa Sugbo nga tag-P1 ka milyon ang itunol ngadto sa mga dakbayan sa Bago ug La Carlota ug sa mga lungsod sa La Castellana, Moises Padilla, ug Pontevedra.
Samtang P2 milyones ang bahin alang sa siyudad sa Canlaon sa Negros Oriental.
Giklaro hinuon sa Actig Mayor nga kinahanglan pang motando ang Konseho sa Dakbayan sa Sugbo nga mohatag ang dakbayan og hinabang, nga adunay kahigayonan nga mokunhod o kaha mosaka pa sa P7 milyones, mag-agad lang unya sa kagustohan sa konseho.
Samtang, kini giklaro ni Cebu City Councilor Noel Wenceslaco, kinsa ang chairman sa committee on Budget and Finance sa konseho sa dakbayan sa Sugbo na kinahanglan pang motugot ang konseho nga mohatag ang dakbayan og hinabang, nga adunay posibilidad nga mokunhod o kaha mosaka pa kini sa orihinal na P7 milyones.
Kuhaun ang maong pundo gikan sa Disaster Fund sa dakbayan sa kasamtangang tuig.
Ipahigayon ang maong deliberasyon sa Sagguniang pinaagi sa Special Session mahitungod kini sa umaabot nga regular holiday sa adlaw ng miyerkules sa pag-selebrar sa Adlaw sa Gawasnon sa tibuok Pilipinas.
Dugang niini, nipasalig ang konsehal nga ang paghatag sa hinabang pinansyal kay dili kini makahinungdan og kabalaka sa dakbayan sa hingpit na pag-abot sa panahon sa uwan-uwan sa pag-mobilize sa mga operasyon niini.
