Planong iduso ni Cebu City Mayor Nestor Archival, ang pagpasumitir og “undertaking of commitment” alang sa tanang contractor sa umaabot nga flood control projects sa Department of Public Works and Highways (DPWH) sa dakbayan sa Sugbo.
Kini aron nga patubagon ang mga contractor kun ugaling adunay kadaot ug pagkalangay sa pagkompleto sa proyekto.
Asoy ni Cebu City Mayor Nestor Archival, nga ang mga contractor nga mapakyas sa pagsumiter sa gikinahanglan nga buluhaton dili mahatagan og permit to proceed.
Gipasabut usab ni Archival, nga gikinahanglan ang maong lakang sanglit kay sapagkakaron ang kagamhanan sa dakbayan walay “hold” sa mga contractor sa DPWH, gumikan kay direkta silang mo- report sa ahensiya.
Gitahasan usab sa Mayor, ang City Legal Office nga tun-an ang posibilidad sa pag-require sa mga contractor nga mopirma og undertaking of commitment. Apil na niini ang ilang panaad nga mobayad sa liquidated damages sa mga nalangan nga proyekto.
Gawas niini, plano usab niini nga mas pahugtan pa ang guidelines alang sa mga kontraktor sa DPWH, lakip na ang pagsunod sa mga timetable, deployment sa ilang kaugalingong traffic enforcers, pag-instalar sa saktong warning devices, pag-assign sa mga personnel sa paglimpyo sa construction residue, ug pag-post sa impormasyon sa proyekto.
Kahinumdoman, mipadayag usab og kasagmuyo si Archival, sa usa ka flood control project nga anaa doul sa overpass sa Banilad, nga hangtud karon wala pa mahuman.
