CEBU – Magpagawas ug direktiba si Cebu City Mayor Michael Rama alang sa pagbalik sa face-to-face classes sa mga tunghaan, universities and colleges dinhi sa dakbayan sa Sugbo.
Sa pakighinabi sa Bombo Radyo Cebu sa naasoy nga mayor, gibutyag niini nga nakigpulong na kini sa pipila ka mga kadagkuan sa universities and colleges ug pulos kini mi-uyon.
Hinuon, gipangayo ni Mayor Rama ang ‘commitment’ sa mga naasoy nga tunghaan nga gikinahanglan bakunado ang tanang mga magtutudlo ug mga tinun-an.
Subay niini, magpagawas ang mayor ug executive order nga maghatag ug agi-anan sa vaccination program sa nagkadaiyang tunghaan dinhi sa syudad.
Gituohan sa mayor nga pinaagi niini kay mahimong obligado ang mga tunghaan nga bakunahan ang ilahang mga tinun-an, magtutudlo, lakip na ang mga ginikanan, isip requirement sa reopening sa 100% nga face-to-face classes.//
Gipadayag ni Rama nga dili na niini kinahanglan nga magpadala ug suwat sa Commission on Higher Education o CHED ug siya na mismo ang magpagawas sa maong direktiba.
