CEBU – Mimando si Cebu City Mayor Michael Rama nga ipalihok na ang ‘long overdue’ nga Bus Rapid Transit project sa dakbayan.
Gibutyag sa mayor nga usa kini sa iyahang mga prayoridad ug naka-andam na ang pondo alang niini hinungdan nga posibling masugdan na kini sa sunod tuig.
Matud pa, dako kini nga tabang sa pagsulbad sa problema sa mga ma-stranded nga pasahero, ingon man usa kini sa mga plano alang sa katuyoan nga Singapore-like Cebu City.
Samtang, wala mu-uyon si Cebu City Councilor James Cuenco, chairman sa Committee on Transportation sa maong proyekto gumikan kay giingong makapasamot kini sa traffic.
Sigon pa sa konsehal nga kung gihimo kini 20 katuig ang nakalabay diin gagmay pa ang sakyanan, maayo kining himuon apan sa karun nga mi-triple na ang gidaghanon sa mga sakyanan ug gamay ang dalan, hayan dili kini angayan nga ipadayon.
Nasayran nga daghang mga panimalay ug business establishments ang ma-igo sa maong proyekto, rason usab nga wala gayud mapadayon ang maong katuyoan sa mga nakalabay nga administrasyon.
