CEBU CITY-Mipadangat og mensahe ang buhatan sa Cebu City Police Office sa katawhan nga magbinantayon ilabi na sa mga deboto nga musalmot sa mga aktibidad alang sa Fiesta Señor 2024.
Gibutyag ni PLt. Col. Janette Rafter ang Deputy City Director for Operations sa CCPO nga daghang mga Police Personnel ang ilahang gipang deploy sa Basilica Minore Del Sto. niño tungod kay gilauman nga mas mudaghan pa ang mga tawo o deboto nga mutambong sa maong simbahan ilabi na nga nagkaduol na ang Sinulog.
Matod ni Rafter nga wala’y gipili nga oras ang pagpunsisok sa mga katawhan, dili lang sa Basilica Minore Del Sto. niño apan lakip na usab sa mga kadalanan.
Dugang niini, mas gipahugtan pa ang police visibility aron masiguro dili lang ang safety sa mga tawo nga mutambong, apan lakip na usab ang pag maintenar sa kahapsay ug kalinaw sa kadalanan ug sa simbahan.
Subay sa maong balita, sa panahon sa Sinulog nga mudagsa ang mga katawhan, dako nga posibilidad nga manggawas pud ang mga mangingilad o scammers.
Panghimangno usab ni Rafter sa katawhan nga pabilin mag-amping, magbinantayon og aduna man gani mabantayan nga mga kakulian o kaduda-duda nga mga lihok sa uban tawo, muduol dayon sa kapulisan og i-report dayon aron mabuhatan og tukmang aksyon.
