CEBU – Maisugong gibarugan ni Cebu Governor Gwendolyn Garcia ang mga nalatid sa iyang bag-ong kamandoan nga Executive Order 16-2022 o ang ‘Rationalization The Wearing of Face Mask Within Cebu’.
Matod ni Governor Garcia nga wala kini mag ingon nga dili na mag facemask ang mga anaa sa open area kundi optional o discretion na kini sa tawo samtang kadtong naay sintomas kinahanglan gihapon magsul-ob og face mask ingon man kadtong naa sa mga closed and air conditioned og tawhanong lugar.
Nagkanayon si Garcia nga karon na ang saktong panahon aron aksyonan ang isyu sa pagsul-ob og facemask gumikan daghan nang mga LGU’s ang gipaubos nasa Alert Level 1 ug gamay na kaayo ang kaso sa COVID-19.
Gidugang pa sa gobernadora nga dul-an 30 na ka mga nasud ang wala na mogamit ug facemask tungod sa pagmenus sa ilang mga kaso.
Gibanatan usab ug balik sa gobernadora si DILG Secretary Eduardo Año samot nasa mando niini ngadto sa kapulisan nga ipadakop ang wala nag facemask ug paghulagway pa sa gobernadora nga usa kini ka anti-poor nga polisiya.
Mensahe nalang sa gobernadora ngadto sa nasudnong mga ahensiya nga mobaraw sa mao niyang kamandoan nga tahuron ang local autonomy samot nang wala niya kini gihimo alang sa iyang ka pritso kundi alang sa katawhan sa Probinsiya sa Sugbu kinsa ning bag-ohay lang nihatag napod niya ug makabungog nga mandato.
