Nipasidaan si Cebu Governor Pamela Baricuatro nipasidaan batok sa ilegal nga pagsulod sa mga baboy sa lalawigan samtang gisusi sa mga awtoridad ang tinubdan sa bag-o lang nakumpirmang kaso sa African Swine Fever (ASF) sa lungsod sa Ginatilan sa habagatang kasadpan sa Sugbo.
Matod ni Baricuatro nga ang kagamhanang probinsiyal nagsusi pa kon giunsa pag-abot sa virus ang duha ka barangay sa habagatang bahin sa lungsod sa Sugbo, diin nakumpirma ang impeksyon niadtong Setyembre.
Dugang niini nga iyang gituki ang sitwasyon uban ni Negros Oriental Gov. Manuel “Chaco” Sagarbarria, lakip na ang posibilidad nga ang mga baboy nga iligal nga gihatod mahimong nakasulod sa Sugbo bisan pa sa border controls.
Kahinumduman nga gidili sa Sugbo ang pagsulod sa mga binuhing baboy ug mga produkto sa baboy gikan sa mga dapit nga adunay ASF, apil na ang mga apektadong lugar sa Negros Island Region.
Diin ang restriction una nga gipahamtang ubos sa Executive Order No. 38, nga nagtakda og 45 ka adlaw nga pagdili sa mga covered shipment. Apan, gilugwayan ni Baricuatro ang pagdili sa laing 45 ka adlaw pinaagi sa EO No. 44.
Ang mga lagda magamit kung ang mga baboy o mga produkto sa baboy gidala sa Sugbo alang sa komersyal nga katuyoan o alang sa personal nga paggamit.
Mamahimo usab nga magpahamtang ang nasud og mga pagdili sa ubang mga produkto nga may kalabotan sa baboy kung kini gikonsiderar nga posible nga ruta sa transmission sa ASF.
