CEBU CITY — Nagkasinabot ang mga mayor sa Sugbo nga paluagan ang lockdown sa lalawigan ubos sa general community quarantine (GCQ) karong Mayo 20.
Kini human nga nakig-meeting si Cebu Governor Gwendolyn Garcia sa mga mayor aron hisgutan ang mga lakang ug polisiya ning pagdowngrade gikan sa enhanced community quarantine ngadto sa general community quarantine.
Nagkasabot ang mga mayor sa ipatumang mga lagda gikan sa transportasyon, establisimento, ug dugang pang mga health protocols.
Nagkanayon si Garcia nga panahon na aron mag-move on alang sa hinay-hinay nga pagbangon sa lalawigan human sa grabeng epekto sa COVID-19 pandemic.
Ipatuman sa gihapon ang mas hugot nga seguridad sa mga utlanan tali sa dakbayan sa Sugbo ug sa mga kasikbit niining lugar.
Gibarugan usab sa gobernadora nga nagagikan sa mga nahipos nga mga datos ang tanang desisyon alang sa pagpatuman sa GCQ.
Una nang gitumbok sa National IATF ang Cebu Province isip moderate low-risk diin girekomendar ang pagpatuman sa GCQ.
