CEBU CITY – Nagdeklarar og outbreak ang Provincial Environment and Natural Resorces Office (PENRO) gumikan sa pagdaghan sa crown of thorns kon dap-ag sa probinsya sa Sugbo.
Matud ni Baltazar Tribunalo Jr, ang pangulo sa Provincial Disaster Risk Reduction and Management Office(PDRRMO) nga mukabat na sa 50 ka mga marine protected areas ang apektado sa pagdaghan sa dap-ag nga mipatay sa gasang kon corals. Gumikan niini nakahukom matud pa ang PENRO nga mag deklarar og outbreak aron masolusyunan ang problema.
Gipasabot ni Tribunalo nga kasagarang mutumaw ang mga dap-ag sa panahon sa ting init diin mulatay sila sa mga gasang diin ilang supsupon ang dugos niini hangtud mamatay. Sa higayon nga mangamatay ang mga gasang wala nay pagkaon ug maestaran ang mga isda.
Lakip sa mga lugar nga pektado mao ang isla sa Camotes, Bantayan, Alegria, Tabogon, Moalboal ug daghan pa.
Padayon pa nga gisuta kon pila ang danyos nga namugna sa mga dap-ag sa gasangan sa probinsya. Gumikan niini magpahigayon ug clean up drive ang PENRO aron nga panguha-on ang mga crown of thorns. Nanawagan si Tribunalo ngadto na sa mga divers nga mag-organisa sa ilang grupo aron makaapil sa maong kalihukan.// Duna matud pay cash for work program diin pagabayaran sila sa probinsya sa ilang pagpanguha sa maong matang sa mananap.
