PROVINCE OF CEBU-Andam ang Cebu Police Provincial Office (CCPO) nga mohatag og hinabang sa mga biktima sa baha ug uban pang susamang insidente sa Sugbo.
Kini human nga sukad niadtong Lunes, Septiyembre 11, 2023, ang kusog nga uwan ??naghasol sa Sugbo ug niresulta sa pagbaha sa daghang dapit sa Cebu City ug Mandaue City.
Sa miaging tulo ka adlaw, daghang mga indibidwal ang napugos sa pagbakwit temporaryo gikan sa ilang mga panimalay ug giluwas sa mga emergency personnel tungod sa baha sa ilang mga lugar.
Subay niini gitino ni Police Major Nolan Tagsip, Public Information Officer sa CPPO, nga andam na silang mopahigayon og search and rescue operations kon gikinahanglan.
Gipasalig ni Tagsip sa publiko nga gibansay og maayo ang ilang mga police personnel sa pagdumala sa rescue operations.
Dugang pa, nga sukad niadtong Lunes, gihatagan na sila og kamanduan nga i-activate ang ilang search and rescue teams alang sa bisan unsang posibleng sitwasyon.
Sumala sa opisyal, nga ang matag police station sa lalawigan sa Sugbo, adunay usa ka team sa search, rescue, ug retrieval nga nagdumala sa pagtubag sa mga katalagman ug paghatag sa gikinahanglan nga tabang.
