PROVINCE OF CEBU- Nagsugod na ang Cebu Provincial Government sa pagpangandam alang sa ASEAN Leaders’ Summit karong Mayo 5 hangtod 9, nga gilauman tambongan sa kapin 3,000 ka partisipante gikan sa 11 ka miyembro sa ASEAN.
Sumala ni Cebu Governor Pamela Baricuatro, gipahigayon ang coordination meeting uban ni Tourism Assistant Secretary Maria Angela Javier aron hisgutan ang mga preparasyon, lakip na ang traffic management, site enhancements, ug inter-agency coordination.
Gitambongan ang tigom sa mga representante gikan sa tri-cities sa Cebu, Mandaue, Lapu-Lapu, ug mga national line agencies sama sa DFA, DILG, DOT, DPWH, DTI, DND, Philippine Coast Guard ug Office of Civil Defense.
Girekomenda sa Police Regional Office-7 ang moratorium sa pag-isyu og permit sa running events ug asynchronous classes aron mapagaan ang trapiko.
Gilauman usab nga makigtagbo si President Ferdinand Marcos Jr. sa mga lider sa ASEAN member states atol sa summit.
Kahinumduman, nga ang Cebu gigamit na usab isip venue sa uban pang ASEAN ministerial- ug senior officials-level meetings sa tibuok tuig, lakip ang ASEAN Socio-Cultural Community sa Hulyo, ASEAN-Japan Comprehensive Economic Partnership sa Hulyo, ASEAN Transportation Ministers’ Meeting sa Nobyembre, ug uban pa.
