Gisugdan na sa mga departamento sa Kagamhanan sa Probinsya sa Sugbo ang sunod-sunod nga strategic planning sessions aron ipahaom ang ilang mga programa, proyekto, ug kalihokan sa direksyon ug prayoridad ni Gobernador Pamela Baricuatro alang niining tuiga.
Ang maong proseso nakaangkla sa “leadership and governance lens” sa gobernador nga naghatag og gibug-aton sa pamaagi nga process-oriented, purpose-driven, ug performance-based diha sa serbisyo publiko aron maseguro nga ang mga lihok sa gobyerno organisado, tubag sa tinuod nga panginahanglan, ug masukod ang epekto niini.
Sa pagkakaron, nakapahigayon na og strategic planning ang Provincial Disaster Risk Reduction and Management Office (PDRRMO), Provincial Veterinary Office (PVO), Provincial Social Welfare and Development Office (PSWDO), ug ang Provincial Legal Office (PLO).
Nakatutok ang maong mga sesyon sa pagpahimutang sa klaro nga mga prayoridad, pagpalambo sa mga proseso sa trabaho, ug pag-align sa mga programa sa matag departamento ngadto sa mas lapad nga mga tumong sa administrasyon.
Gikatakda usab nga mopaubos sa susamang strategic planning sessions ang uban pang mga buhatan sa Kapitolyo sa mosunod nga mga semana.
Kabahin kini sa nagpadayong paningkamot sa kagamhanang probinsiyal nga makamugna og nagkahiusa ug results-driven nga plano alang sa tibuok tuig ubos sa pagdumala sa kasamtangang administrasyon.
