CEBU – Nipagawas og IRR ang probinsya sa Sugbo kalabot sa optional nga paggamit og face mask.
Nagpost ang buhatan ni Cebu Governor Gwen Garcia og mga giya sa ordinansa nga naghimo sa paggamit sa facemask sa probinsya nga optional taliwala sa pandemya.
Sumala sa mga panudlo, nagtumong ang optional nga paggamit sa face mask sa “pagpasiugda sa usa ka makatarunganon ug praktikal nga paagi sa pag-atubang sa Covid-19 pandemic.
Nakalatid sa maong dokumento nga polisiya usab sa lokal nga kagamhanan sa lalawigan sa Sugbo nga dasigon ang “makatarunganon ug praktikal nga mga pamaagi” sa pag-atubang sa pandemya sumala sa mga prinsipyo sa hustisya sa katilingban, kaangayan, ug sentido komon.
Magamit ra ang implementing rules and regulations (IRR) sa mga local government units ug constituents ubos sa territorial jurisdiction sa lalawigan sa Sugbo.
Gipahayag usab sa IRR nga giawhag gihapon ang mga tawo nga magpadayon sa pagsul-ob og face mask sa mga outside areas nga dagsaonon sa katawhan.
Mandatory sa gihapon ang paggamit og face mask sa mga sirado ug/o air-conditioned nga mga lugar.
