CEBU – Gipangulohan ni Cebu Province Governor Gwen Garcia ang pag-abli sa mga bag-ong concrete roads sa lungsod sa Barili habagatang bahin sa probinsiya sa Sugbo.
Gawas ni Gobernador Garcia, nitambong usab sa maong kalihokan sila si Barili Mayor John-John Garica, 3rd District Board Member Jimbo Borgonia, 3rd District Congressman Pablo John Garcia ug uban pang gipasidunggang dinapit.
Ang maong gi-ablihan nga karsada nga nagkantidad og kapin sa 4o milyones ka pesos magdugtong sa duha ka barangay sa Barili nga mao ang Barangay Tal-ot ug Barangay Cabcaban nga gikalipay usab sa mga residente ug motorista nga moagi sa naasoyng dapit.
Mapasalamaton usab ang mga ginikanan, mga magtutudlo ug mga tinun-an kay panahon sa ting-uwan ug tingklasi dili na lapokon ang dalan nga ilahang agi-an.
Atol sa speech ni Gobernador Garcia, mihatag kini og inspirational message sa mga tinun-an nga mitambong sa maong kalihokan nga dili himuong babag ang kalisud aron molampos sa gitinguhang damgo sa kinabuhi.
