Midagsa ang mga vounteers sa Capitol aron maghatod sa ilang donasyon ug ihatag ang ilang kusog alang sa mga nanginahanglan, kini human nawagan si Governor Pamela S. Baricuatro og mga gusto mohatag sa ilahan tabang.
Lakip sa mikuyog mao ang kapin 100 ka medical students, mga health workers, ug bisan ordinaryong mga katawhan nga walay medical background apan buot nga mosalmot ug motabang sa operasyon.
Ang uban kanila, gipadala na sa Northern Cebu aron direktang makatabang sa relief ug medical missions sa mga lugar nga grabe ang kadaot sa 6.9 magnitude nga linog.
Kini nga kusog nga pagtambayayong nagpadayag sa espiritu sa bayanihan ug kaisog sa mga Sugbuanon, nga bisan unsa pa ang kalisod, magpadayon ang paghiusa, kalooy ug tinabangay.
Padayon usab ang pag-abot sa mga donasyon sa Capitol, lig-on nga ebidensya nga mas kusgan ang kasingkasing ug pagkahiusa sa katawhan kay sa bisan unsang kalamidad.
