CENTRAL VISAYAS- Gisuspenso sa Coast Guard District Central Visayas (CGDCV) ang mga biyahe sa dagat sa pipila ka bahin sa Bohol ug Cebu subay sa alerto nga gipagawas sa Philippine Atmospheric, Geophysical and Astronomical Services Administration (PAG-ASA) kabahin sa dili maayong kondisyon sa panahon.
Kini gikumpirma sa CGDCV, nga ang maong lakang gipatuman aron malikayan ang posibleng disgrasya sa kadagatan nga resulta sa baluron ug kusog nga hangin nga nasinati karon sa rehiyon.
Partikular nga naapektuhan ang kasadpang bahin sa Bohol, diin ang pagbiyahe sa mga barko nga 15 gross tonnage (GT) paubos gisuspenso.
Samtang, sa Northern Cebu, gilakip sa suspension ang tanan nga barkong 35 GT paubos.
Sumala pa sa CGDCV ng maong desisyon nakabase sa pinakabag-ong weather bulletin nga ginapagawa sa PAG-ASA matag upat (4) ka oras.
Gipasabot sa mga otoridad nga kini nga preventive measure kabahin sa coordinated effort sa CGDCV uban sa mga Local Government Units (LGUs) ug mga shipping operators aron masiguro ang kaluwasan sa tanang pasahero ug crew sa dagat.
Nagpadayon usab ang pagbantay sa kadagatan, diin adunay katugbang nga silot ang mga shipping operators o pribadong mga barko nga maglapas sa nasangpit nga mando.
Sa pagkakaron, gipahimangnoan sa CGDCV ang publiko nga likayan ang pagpugos sa pagbiyahe ilabi na sa mga dapit nga sakop sa suspension samtang padayon nga gisusi ang weather condition.
