Gikumpirmar ni Department of the Interior and Local Government (DILG) Secretary Jonvic Remulla nga mibiya na sa nasud ang gambling tycoon nga si Charlie “Atong” Ang pinaagi sa usa ka “backdoor.”
Nagdumili si Remulla sa paghatag og dugang detalye mahitungod sa eksaktong petsa ug pamaagi sa pagbiya ni Ang, tungod kay nagpadayon pa ang imbestigasyon sa mga awtoridad.
Wala usab gibutyag sa opisyal kung asa katapusang nakita ang negosyante, ilabi na nga padayon pa siyang gipangita sa mga awtoridad.
Gipangita si Ang may kalabutan sa gitaho nga pagkidnap ug pagpatay sa gibana-banang 34 ka mga sabungero, mga indibidwal nga gituohang mitambong sa mga sabong nga konektado sa iyang negosyo tali sa tuig 2021 ug 2022.
Ang Department of Justice mirekomendar sa pagpasaka og 26 ka kaso sa pagkidnap batok kang Ang ug kapin sa 21 ka uban pang indibidwal—lakip na ang 15 ka mga pulis—human gibutyag sa usa ka saksi nga ang mga biktima giluok ug gilabay sa Taal Lake sa Batangas, nga gituohang gihimo subay sa mando sa maong negosyante.
