Gipahibalo ni Interior Secretary Jonvic Remulla nga giingong nakit-an sa Cavite ang puganteng negosyante nga si Atong Ang, apan nakalingkawas kini sa wala pa makaabot ang mga otoridad sa lugar.
Atol sa Kapihan ng Samahang Plaridel forum, miingon si Remulla nga gibana-bana nga 400 ka personnel gikan sa Criminal Investigation and Detection Group ang gilayon nga naglunsad og operasyon human makadawat og impormasyon kabahin sa nahimutangan ni Ang.
Matod sa kalihim, paspas nga milihok ang mga awtoridad apan nakagawas si Ang sa wala pa nila maabtan ang target area.
Si Ang nag-atubang og mga kasong kidnapping with homicide ug kidnapping with serious illegal detention nga may kalabotan sa kaso sa mga nawalang sabungero.
Kahinumduman nga niadtong Abril, giisyuhan si Ang og red notice sa Interpol, nga nag-awhag sa mga law enforcement agencies sa lain-laing nasud sa pagpangita ug pagdakop kaniya.
Aduna usab kini P20 milyon nga reward alang sa bisan kinsa nga makahatag og impormasyon nga makatabang sa pagtudlo sa iyang nahimutangan.
Nagpadayon sa pagkakaron ang manhunt operations sa mga awtoridad batok sa negosyante.
