Gitumbok sa Ministry of National Defense sa China nga ang Pilipinas maoy giingong tinubdan sa kasamok ug kapeligrohan sa West Philippine Sea (WPS).
Kini nunot sa gipakusog nga baruganan sa nasud sa maritime surveillance ug pakig-alyansa sa mga silingang nasud sa rehiyon.
Matod ni Senior Colonel Zhang Xiaogang sa defense ministry sa China, ilegal ang pag-okupar sa Pilipinas sa Kalayaan Island Group, ug ang nasud maoy gibasol sa pagtaas sa tensyon pinaagi sa maritime patrols ug presensya sa dagat.
Kini isip tubag sa bag-ong pamahayag ni Defense Secretary Gilberto Teodoro Jr. nga ang Armed Forces of the Philippines mobalhin sa ilang focus gikan sa internal security ngadto sa external defense—ilabina kay wala mohunong ang agresibong aksyon sa China sa WPS.
Ingon man nga giinsister ni Teodoro nga ang nine-dash line claim sa China supak sa internasyonal nga balaod, ug nipasalig nga ang administrasyong Marcos Jr. makigbisog alang sa katungod sa nasod sa kadagatan.
Hinungdan nga nipasidaan ang China nga mohimo sila og mga lig-on nga lakang kon magpadayon ang mga pagpanghagit sa Pilipinas.
Bisan pa niini, ang Pilipinas padayong miinsister sa kabalido sa 2016 arbitral ruling nga nag-invalidate sa halapad nga pag-angkon sa China sa South China Sea.
