Naglunsad ang militar sa China og hiniusang naval ug air training exercise sa palibot sa Scarborough Shoal sa West Philippine Sea, nga gitawag sa China og Huangyan Dao ug nailhan sa Pilipinas isip Bajo de Masinloc.
Sumala sa People’s Liberation Army Southern Theater Command, gihimo ang ehersisyo isip tubag sa mga aksyon sa pipila ka nasod nga giingon nilang nakadaot sa kalinaw ug kalig-on sa rehiyon, ug tumong niini nga masuta ug mapalig-on ang ilang combat capabilities sa pagpanalipod sa ilang giangkon nga territorial sovereignty ug maritime rights.
Wala pa makahatag og pahayag ang Philippine Embassy sa Beijing ug ang Philippine Coast Guard bahin sa maong ehersisyo. Diin ang Scarborough Shoal nahimutang sa 124 nautical miles gikan sa Masinloc, Zambales ug sakop sa 200-nautical-mile exclusive economic zone sa Pilipinas ubos sa UNCLOS.
Samtang niadtong 2016, gipamatud-an sa Permanent Court of Arbitration nga ang mga bato sa shoal dili makahatag og kaugalingong exclusive economic zone o continental shelf, ug nakit-an usab sa tribunal nga tradisyonal nga pangisdaan kini sa mga mangingisda sa nagkalain-laing nasod, lakip ang Pilipinas.
