Nagpahigayon ang China og missile test-fire gikan sa ilang nuclear-powered submarine ngadto sa Pacific Ocean.
Diin ang lakang nakakuha dayon og mga pagsaway ug kabalaka gikan sa mga silingang nasud sama sa Japan, Australia, ug New Zealand. Gumikan naalarma sila sa padayon nga pagpalapad sa militar sa China sa rehiyon.
Ang missile adunay sulod nga dummy warhead, ug nahulog ang missile sa internasyonal nga katubigan sa Pasipiko, nga gitudlo nga usa ka designated area. Hinuon, bisan pa, wala gipagawas sa China ang bisan unsang detalye bahin sa eksaktong lokasyon sa pagkahulog niini.
Sumala sa report, ang paglansad sa missile sa China usa lamang ka rutina nga kahikayan alang sa tinuig nga pagbansay sa militar niini. Giklaro usab sa ilang gobyerno nga ang pagbansay wala gitumong sa bisan unsang nasud o partikular nga target.
Ang missile test nahitabo pipila lang ka oras human ang Australia ug Fiji mipirma og bag-ong alyansa sa depensa. Ubos sa kasabutan, ang duha ka nasud misaad nga magtinabangay ug magsuporta sa usag usa kung adunay bisan unsang hulga o pag-atake.
