Gibasura sa Embahada sa China sa Pilipinas isip ‘fake news’ ang mga mikaylap nga post sa social media nga nag-ingon nga usa ka bag-ong outbreak sa sakit sa China nga miresulta sa ‘international health concern’.
Daghan ang nakurat ug nahadlok sa mikatap nga mga post kabahin sa pagtaas sa mga sakit sa respiratoryo, lakip ang human metapneumovirus (HMPV), Influenza A, Mycoplasma pneumoniae, ug Covid-19.
Hinungdan nga gihatagan og katin-awan ni Chinese Embassy Director for Media Section Tom Wu nga walay kamatuoran ang pangangkon nga balita ug usa kini ka fake news.
Ingon man nga gilimod usab ni Wu ang pipila ka mga post diin nagdeklarar og state of emergency ang China.
Giklaro usab sa Department of Health (DOH) nga walay kompirmasyon gikan sa World Health Organization (WHO) o mga awtoridad sa China bahin sa giingong outbreak.
Gipasaligan usab niini ang mga Pilipino nga kini aktibo nga nagpamatuod sa kasayuran bahin sa butang ug giawhag ang publiko nga likayan ang pagpaambit sa mga wala pa gipamatud-an nga mga taho aron malikayan ang pagkaylap sa sayop nga impormasyon ug pagbutho sa kalisang ug kahadlok sa mga tawo.
