Cebu City– Mapasalamaton si CIDG-7 Director, Police Supt Royina Marzan Garma sa paghatag kaniya sa mga kanhi tawo ni CIDG-8 Director , Police Suot. Marvin Marcos. Una niini gikumpirmar ni Garma nga 9 ka mga kanhi miembro sa CIDG 8 ug kauban ni Supt Marcos nga nakasuhan human napatay si Albuera Leyte Mayor Rolando Espinosa ang naasign na karon sa CIDG 7 ubos sa iyang pagdumala.
Matud ni Garma nga gikalipay niini ang dugang nga pwersa sa CIDG 7 sanglit matud pa nga aduna nay mga skills hilabi na sa investigation ang mga tawo ni Supt. Marcos. Sa siyam ka mga police gikan sa CIDG 8, 3 niini ang ranking officers samtang unom ang PNCO. Matud pa niini nga ipang assign niya sa mga provincial unit sa CIDG ang mga nadugang nilang miembro diin hatagan niya kini ug posisyon isip head sa investigation.
Gihimug-atan ni Garma nga bisan tinuod ug adunay giatubang nga kaso ang maong mga pulis, wala kini nagpasabot nga dili na sila kasaligan. Gipasabot ni Garma nga ang maong mga pulis ang mibuhat lamang sa ilang obligasyon ug kabahin na sa ilang trabaho nga mapasakaan sila og kaso.
Gipasiguro naman niini nga dili mahitabo sa region 7 ang nahitabo sa region 8 sanglit matud pa nga iyahang giyahan ang biyang mga sakop nga kanuany gayud nga tumanon ang PNP procedure matag adunay ipahigayon nga operasyon.
