CEBU CITY- Gipasiugdahan sa Cebu City Police Office, nga gipangulohan ni City Director Police Col. Antonietto Cañete, ang “Pakighimamat ni CD” nga kalihokan sa Barangay Sinsin Gymnasium.
Diin ang panagtapok niabi-abi sa nagkalain-laing maabihon nga mga bisita lakip ni Hon. Rowela Rosal, Chairperson sa Police Station 7 Advisory Group, mga opisyal sa Barangay Sinsin nga gipangulohan ni Barangay Captain, Hon. Aurelio Laspoña, ug mga representante gikan sa nagkalain-laing sektor sa komunidad.
Nasayran nga ang sentro sa maong kalihokan kay ang pagtubag sa mga kritikal nga isyu sama sa ilegal nga drogas ug pagpugong sa krimen.
Ingon man ang panginahanglan sa kooperasyon ug panaghiusa sa komunidad sa pag-atubang niini nga mga hagit, nga nag-awhag sa mga opisyal sa barangay ug mga residente nga makigtambayayong sa pagpatuman sa balaod.
Kini nga inisyatiba kabahin sa mas lapad nga estratehiya sa CCPO aron mapalambo ang suporta sa katawhan sa pakigbatok sa ilegal nga drugas ug kriminalidad.
Pinaagi sa pagpalambo sa pakigtambayayong sa mga miyembro sa komunidad, ang CCPO nagtinguha sa pagpataas sa kahibalo sa publiko ug pagtukod og usa ka transparent, ug collaborative community policing framework.
