CEBU CITY-Mibahad si City Mayor Michael Rama, nga mapugos siya sa pagpasaka og mga legal nga kaso sa bisan kinsa nga mosulay pagbabag sa proyekto sa Cebu Bus Rapid Transit (CBRT).
Kini ang nahimong pamahayag sa Mayor niadtong Huwebes, Marso 7, nga dili siya magduha-duha sa pagpasaka og kaso batok kang Cebu Provincial Gobernador Gwen Garcia kon mo supak kini sa proyekto.
Matod sa mayor, nangandam na siya sa pagpasaka og kaso batok sa mga indibidwal nga mosupak sa pagkompleto sa CBRT.
Dugang pa, nga ang mga tawo nga mosupak sa proyekto dili lang makababag sa pag-uswag sa CBRT kondili makapasamot usab sa kahimtang sa trapiko sa dakbayan sa Sugbo.
Ang reaksyon ni Rama nitumaw human ang League of Municipalities in Cebu (LMP-Cebu) nihatag sa ilang suporta sa Kapitolyo sa awhag niini sa pagpahunong sa pagtukod sa BRT.
Kung diin ang LMP-Cebu niluwat og resolusyon nga nanawagan sa hinanaling pagpahunong sa nagpadayong Cebu Bus Rapid Transit (CBRT) project.
Samtang giila ni Rama ang heritage concerns nga gipatungha sa Probinsiya sa Sugbo, nipadayag siya og kasagmuyo nga daghang mga personalidad ang niuyon karon sa ilang kaugalingon sa panawagan nga ihunong ang proyekto.
