CEBU CITY – Nakatutok sa tulo ka butang ang angayan nga madungog sa katawhan gikan sa mga managan sa 2022 national elections.
Subay kini sa pakighinabi sa Bombo Radyo Cebu kang Dr. Clarita Carlos, University of the Philippines-Diliman Political Science Professor diin gibutyag niini nga angayan nga masayran sa mga Pilipino gikan sa matag kandidato ang plano niini sa panglawas, edukasyon ug climate change.
Matud ni Dr. Carlos nga ang Pilipinas usa sa adunay pinaka-taas nga coastline lukop kalibotan apan wala na kini makita gumikan sa nagkasaka nga tubig sa dagat hinungdan nga angayan nga adunay mga kandidato nga maghisgot kabahin usab sa climate change.
Giingong kini ang mga butang nga angayan nga ikonsiderar sa mga botante sa pagpili ug kandidato sa umaabot nga bugnong lugaynon sunod tuig.
Nagkanayon si Dr. Carlos nga gawas sa ilahang mga plano sa politika, angayan nga hatagan ug pagtagad sa mga kandidato ang naasoy nga mga butang diin mao ang pinaka-importante karun sa nasud.
