Gipanghingusgan sa Philippine Coast Guard Bohol, ang pagbantay sa mga magpasulod ug karneng baboy subay na sa gipatuman nga 60 ka adlaw nga temporaryong pag-ban sa mga pag-import og karneng baboy.
Kini human gipatuman sa kagamhanan sa mismong probinsya og 60 ka adlaw nga temporaryong pagdili sa pagsulod sa mga buhing baboy, karne sa baboy, mga produkto sa baboy, ug uban pang gi-regulate nga mga produkto gikan sa Negros Occidental ug Negros Oriental aron mapalig-on ang depensa sa probinsya batok sa African Swine Fever (ASF).
Kini gipirmahan ni Gov. Aris Aumentado pinaagi sa Executive Order (EO) No. 28 niadtong Hulyo 3, 2026, human sa kumpirmadong mga kaso sa ASF sa Isla sa Negros, nga nagpalig-on sa mga lakang sa biosecurity sa utlanan sa Bohol aron mapanalipdan ang industriya sa baboy nga nag-ayo sa probinsya.
Matud ni Lieutenant (junior grade) Babe Joselie Isaga, ang Station Commander sa PCG Western Bohol, nga dakong hagit sa Coast Guard Bohol ang kahalapad sa lalawigan ug ka limitado sa mga personahe nga mabutang sa matag-unit panahon sa pagpatrolya.
Dugang pa niini ang kadaghan sa mga entry points nga dili halos ma-cover sa PCG aro hingpit nga mapukan ang pagpasulod sa mga karne gikan sa gawas sa probinsya, lakip na usab ang padayung kamahal sa gasolina, nga maoy unang panginahanglan sa pagpatrolya sa kadagatan.
Ang EO nagmando usab sa mas estrikto nga veterinary quarantine checkpoints, gipakusog nga inspeksyon sa utlanan, ug hugot nga koordinasyon tali sa mga hingtungdang ahensya ug mga lokal nga yunit sa gobyerno aron masiguro ang pagsunod.
Giawhag usab sa kagamhanan sa Probinsya ang mga negosyante, tighatod, tigbaligya og karne, ug ang publiko nga suportahan ang mga paningkamot sa probinsya pinaagi sa hugot nga pagsunod sa mga regulasyon sa veterinary quarantine aron matabangan nga magpabiling walay ASF ang Bohol.
