CENTRAL VISAYAS- Nagpadayon ang preparasyon sa Commission on Elections (COMELEC)-7 alang sa umaabot nga Barangay ug Sangguniang Kabataan (BSK) Elections, bisan pa sa nagkadaghang panawagan nga ipalangan ang eleksyon.
Matud ni Atty. Francisco Pobe, Regional Director sa COMELEC-7, andam na ang komisyon alang sa pagsugod sa filing of Certificates of Candidacy (COCs) gikan sa Septiyembre 28 hangtod Oktubre 5.
Gipasabot ni Pobe nga sa pagkakaron, magpadayon ang COMELEC sa tanang preparasyon tungod kay wala pa’y bag-ong balaod nga nagpalangan o nagkansela sa Barangay ug SK Elections.
Bisan pa nga adunay House Bill nga nagtinguha sa pagpalangan sa eleksyon, wala pa kini mahimong balaod hangtod dili kini mapasar sa Kongreso ug mapirmahan sa Presidente.
Dugang niya, kung mapalangan man ang eleksyon, dili mahimong problema ang mga napreparar nang election forms ug mga balota.
Matud niya, nahitabo na kini kaniadto sa dihang napostpone usab ang Barangay ug SK Elections, diin ang gihimo lamang mao ang pag-usab sa petsa pinaagi sa opisyal nga resolusyon.
Sa pagkakaron, padayon ang preparasyon sa COMELEC alang sa Barangay ug SK Elections nga gitakdang ipahigayon sa Nobyembre 2, 2025, subay sa kasamtangang balaod.
Samtang, gibutyag usab ni Pobe nga hapit sa lima ka milyon ang rehistradong mga botante sa Cebu ug Bohol nga kwalipikadong mobotar sa umaabot nga Barangay ug SK Elections, lakip na ang mga bag-ong narehistro.
Gipahimangnoan usab sa COMELEC-7 ang mga nagtinguha nga modagan sa eleksyon nga likayan ang premature campaigning.
Matud ni Pobe, tungod kay manual election ang Barangay ug SK Elections, magsugod ang pagpatuman sa lagda batok sa premature campaigning sa higayon nga makafile na ang kandidato sa iyang Certificate of Candidacy ug makagawas na sa opisina sa COMELEC.
Ang bisan unsang sayong pagpangampanya o mga kalihokan nga klarong nagpalambo sa kandidatura sa usa ka kandidato mahimong mahimong basehan sa pagpasaka og reklamo batok kaniya.
Dugang pa niya, ang mga appointed government officials nga modagan sa eleksyon awtomatikong giisip nga resigned sa ilang katungdanan sa higayon nga makafile sila sa ilang Certificate of Candidacy, subay sa balaod.
Gipasiugda usab ni Pobe nga ang desisyon sa Korte Suprema sa usa ka miaging kaso nga may kalabutan sa premature campaigning naglangkob lamang sa automated elections ug dili kini direktang magamit sa manual elections sama sa Barangay ug SK Elections.
Busa, giaghat sa COMELEC-7 ang tanang kandidato nga higpit nga mosunod sa mga balaod sa eleksyon ug likayan ang bisan unsang lihok nga mahimong makalapas sa election laws samtang naghulat sa opisyal nga pagsugod sa campaign period.
