CENTRAL VISAYAS- Nagpalig-on na ang Commission on Elections (COMELEC)-7 sa mga preparasyon alang sa luwas, hapsay ug kredibleng pagpahigayon sa umaabot nga Barangay ug Sangguniang Kabataan (SK) Elections.
Matod ni COMELEC-7 Regional Director Atty. Francisco Pobe, padayon ang koordinasyon sa security forces, local government units ug ubang government agencies aron masiguro ang seguridad sa panahon sa piniliay.
Nakigkoordinar usab ang COMELEC sa Commission on Human Rights (CHR), NAMFREL, Parish Pastoral Council for Responsible Voting (PPCRV) ug mga non-government organizations alang sa pag-monitor sa election process.
Padayon usab ang assessment sa mga posibleng area of concern sa Central Visayas, ilabina human sa filing sa Certificates of Candidacy, aron matino kung asa ang magkinahanglan og dugang nga seguridad.
Gipahimangnoan sa COMELEC-7 ang mga kandidato ug publiko batok sa vote buying, vote selling ug paggamit sa government resources alang sa pangampanya.
Gidasig usab ang publiko nga i-report ang posibleng paglapas sa election laws, uban ang hustong ebidensya ug dokumentasyon.
Samtang, gipatin-aw ni Pobe nga ang pagtakda o pag-usab sa petsa sa Barangay ug SK Elections nagkinahanglan og legislative action gikan sa Kongreso ug dili desisyon sa COMELEC lamang.
