Nipasidaan ang Commission on Elections (COMELEC) nga mohimo sila og dinaliang aksyon batok ni bisan kinsa nga mapamatud-an nga nangawat sa mga obra sa usa ka artista aron gamiton sa ilang campaign jingle.
Matod ni Commission on Elections (COMELEC) Chairman George Erwin Garcia, ang panagtambayayong sa komisyon ug sa Intellectual Property Office of the Philippines (IPOPhil) maoy magbantay sa intellectual rights sa mga artista karong panahon sa kampanya.
Dugang pa ni COMELEC Chairman Garcia nga kinahanglang tahoron ang mga Filipino artists sa ilang kaugalingong mga obra ug dili kay kawaton lang kini.
Kalabot niini, gidasig ni Garcia ang mga artista nga mopasaka og reklamo sa ilang buhatan kung makasinati niini ug imbestigahon dayon kini sa komisyon ug pasakaan og tukmang kaso ang kandidato.
Dugang sa Intellectual Property Office of the Philippines (IPOPhil), nga ang mga kandidato nga mogamit og copyrighted nga mga kanta nga walay pagtugot gikan sa artist mahimong mag-atubang og kaso ubos sa Republic Act No. 8293 o ang Intellectual Property Code of the Philippines.
Ning bag-o lang, si Omar Harry Manzano o mas naila sa pangalan nga ‘Omar Baliw’ nipasaka og reklamo batok sa usa ka senatorial candidate nga nigamit sa iyang kanta isip campaign jingle nga walay pagtugot.
Ingon man ang bandang Lola Amour nipahibalo sa ilang social media nga adunay mga tawo nga nigamit sa ilang kanta nga walay pagtugot.
