Gikompirmar ni Commission on Elections (COMELEC) Chairman George Erwin Garcia nga magpabilin gihapon ang pangalan ni kanhi presidente Rodrigo Duterte sa balota karong piniliay, kini nagpasabot nga kandidato gihapon siya sa pagka mayor sa Davao bisan pa man sa iyang pagkasikop niadtong Marso 11 alang sa imbestigasyon sa International Criminal Court (ICC) nga may kalabotan sa kampanya sa drug war.
Ug gihimug-atan niini nga basta walay final judgement of conviction, ilhon gihapon si Duterte isip kandidato.
Giklaro usab ni COMELEC Chairman Garcia nga sa higayon nga adunay mopasaka og disqualification case batok sa kanhi presidente, iyang gipasalig nga dawaton kini ug ang disposisyon niini maoy mahukman.
Kung adunay mosang-at og petisyon, tan-awon sa poll body ang merito tungod kay walay moto proprio ang komisyon niini nga aspeto.
Kalabot niini, namahayag usab si Garcia nga kon modaog ang usa ka kandidato bisag napriso, ila gihapon siyang ilhon ug iproklamar, ilabi na kon walay final nga desisyon, hukom, o bisan unsa nga makapugong sa iyang proklamasyon.
Samtang, si COMELEC Chairman Garcia nipasalig usab sa publiko nga walay mahitabong pagpanikas sa umaabot nga piniliay nunot sa pamahayag ni VP Sara Duterte kagabii kalabot sa giingong pagpanikas sa piniliay. Nagtuo si COMELEC Chairman Garcia nga dili usab kini direkta alang sa poll body.
Dugang pa niya nga bisan og gigamit karon ang teknolohiya alang sa eleksyon aron masiguro nga walay mahitabong pagpanikas, gisiguro gihapon nila ang transparency sa tibuok proseso sa eleksyon.
