Nisang-at og material misrepresentation complaint ang Commission on Elections batok sa gitaktak nga mayor sa Bamban, Tarlac, Alice Guo, sa Tarlac Regional Trial Court.
Gipasanginlan sa COMELEC si Guo nga nakalapas sa Section 74 sa Omnibus Election Code nga may kalabotan sa Material Misrepresentation.
Una nang niingon si Comelec Chairman George Garcia niadtong miaging semana nga moduso og impormasyon ang poll body human napakyas ang kampo ni Guo sa pagduso og motion for reconsideration sa kaso nga iyang giatubang sa komisyon.
Nag-ugat ang akusasyon batok kang Guo human nadiskubrehan nga ang iyang gisang-at nga certificate of candidacy niadtong 2022 elections nga namakak kini dihang gibutang niya ang iyang kaugalingon nga Filipino.
Apan, nabutyag sa ulahi sa mga hearing sa Senado nga usa siya ka Chinese human ang iyang fingerprint mitugma sa Chinese passport holder nga si Guo Hua Ping.
