Gikumpirma sa Commission on Appointments (CA) niadtong Miyerkules ang promosyon sa lima ka tagas nga opisyal sa Armed Forces of the Philippines (AFP), kapin sa duha ka semana human kini nalangan tungod sa kakuwang sa mga senador nga miyembro sa komisyon.
Atol sa gipahigayon nga pagdungog, giaprubahan sa CA ang mga appointment nilang Lieutenant General Edmundo G. Peralta, Vice Admiral Allan M. Javier, Major General Isagani O. Criste, Brigadier General Niceforo M. Diaz Jr., ug Brigadier General Rosemawatte A. Remo.
Kahinumduman nga naatrasar ang kumpirmasyon sa maong mga opisyal niadtong Hunyo 1 human wala makab-ot ang gikinahanglang ihap sa mga senador nga magsilbing representante sa Commission on Appointments.
Una niini, sa gihimo nga special session sa Senado sa ubos sa bag-ong pamunoan ni Senate President Sherwin Gatchalian, napili ang mga senador nga mamahimong representante sa hawanan ngadto sa CA, hinungdan nga napadayon ang mga naka ong-ong nga kumpirmasyon.
Apil sa mga bag-ong miyembro sa Commission on Appointments gikan sa Senado mao sila si Senate President Pro Tempore Vicente “Tito” Sotto III, Majority Leader Juan Miguel “Migz” Zubiri, ug mga senador nga silang Joel Villanueva, Risa Hontiveros, Raffy Tulfo, ug JV Ejercito gikan sa majority bloc.
Lakip usab sa komisyon ang mga senador gikan sa minority bloc nga silang Loren Legarda, Rodante Marcoleta, Imee Marcos, Bong Go, Jinggoy Estrada, ug Mark Villar.
Gawas sa promosyon sa lima ka heneral sa AFP, giaprubahan usab sa CA ang tulo ka nominasyon ug 83 ka ad interim appointments sa mga opisyal sa Department of Foreign Affairs (DFA) nga sakop sa Philippine Foreign Service.
