CEBU CITY-Gipatimaan sa Commission on Audit (COA) ang Metropolitan Cebu Water District (MCWD) sa profit loss niini, apan wala kini nipakita og kalamboan sa ilahang Non-Revenue Water (NRW) nga nisangpot sa kapin nga P173 milyones nga kapildihan niadtong 2022.
Kaniadtong 2020, ang kinatibuk-ang profit loss sa produksiyon sa tubig sa MCWD nikabat og P64 milyones.
Samtang sa tuig 2021 ang kinatibuk-ang profit loss sa produksiyon sa tubig natala sa P116 milyones.
Usa ka tuig ang milabay, ang NRW sa MCWD ug loss in revenue, mas-nidako diin sumatutal sa tulo katuig nga nilabay ang NRW loss nikabat sa P353 milyones.
Matud pa sa State Auditors nga walay natala nga kabag-ohan ang nakita sa NRW portion sa MCWD sa nilabay nga tulo katuig, diin kini niresulta sa annual revenue loss nga nikabat sa P118 milyones.
Gipasabot sab sa COA nga ang MCWD wala makadawat og subsidy gikan sa nasudnong kagamhanan, busa ang cash flow ug liquidity niini modepende sa resulta sa ilang operasyon.
Uban niini, ang management gilauman nga hingpit nga mapadako ang kita pinaagi sa pagminus sa NRW tungod kay ang suplay sa tubig mao ang labing dako nga gigikanan sa kita sa kompanya.
Apan pasumangil sa MCWD nga ang Cebu naigo sa typhoon Odette kaniadtong December 16, 2021, dugang pa ang hinungdan sa pag-increase sa 49 porsyento niaging January 2022 mahitungod sa widespread nga water pilferage ug ang nisaka nga mga insidente sa typhoon, ingon man nga na manage kini sa MCWD nga mapa-ubsan ang NRW ngadto sa 31 porsyento sa nilabay nga Abril 2023.
