CEBU CITY — Mopahigayon og imbestigasyon ang mayor sa Compostela, Cebu kung misulod ba ang iyang mga konsehal sa investment scheme nga Kabus Padatuon (KAPA) Ministry International.
Matud ni Mayor Joel Quiño nga iyang gidudahan ang pipila sa mga anaa sa konseho kung misulod ba ug mi-invest sa maong investment scheme.
Nasayaran sa mayor nga ilang gibaligya ang mga kahayupan aron lang makahatag sa ilang “donasyon” sa KAPA apan iya pa kining ikumpirmar.
Samtang wala pa mihatag og dugang pa nga pahayag si Quiño kung tugtan ba nga makapahigayon og prayer rally ang mga sakop sa KAPA sa Compostela.
Sigon pa sa mayor nga kung iyang hatagan og permiso ang pagpahigayon og rally, daw sama lang sa wala niya gibarugan ang iyang giluwat nga cease and desist order batok sa KAPA.
Apan tataw pa ni Quiño nga nagpabilin ang iyang responsibilidad nag tubagon ang problema sa katawhan bisan pa man nga nakadawat kini og pagsaway mahitungod sa isyu sa maong investment scam.
