TALISAY CITY, CEBU-Nasikop sa gihimong hot pursuit operation sa kapolisan sa Dakbayan sa Talisay ang usa sa mga suspek nga giingong responsable sa pag-hold up sa usa ka street cleaner ug sa iyang anak sa Barangay San Roque, Talisay City.
Sumala sa pahayag ni Talisay City Mayor Samsam Gullas, paspas nga narespondehan sa kapolisan ang insidente human ma-monitor pinaagi sa CCTV system ug city command center, nga mitultol sa pag-ila ug pagdakop sa suspek.
Giila ang nadakpan nga si Andrew Abellana, 36 anyos, residente sa Upper Guyabano, Barangay Candulawan, Talisay City, nga nadakpan pinaagi sa operasyon sa kapolisan nga gipangulohan ni Lt. Col. Homobuno Sayon.
Ang kaubang suspek nga ilado lang sa alyas “AJ” nagpabilin nga at-large ug giingong mao ang nagmaneho sa motorsiklo nga gigamit sa krimen. Padayon pa ang hot pursuit operation aron madakpan usab siya.
Sa imbestigasyon, ang mga biktima mao ang usa ka Barangay Health Worker ug iyang anak nga lalaki, nga giatake samtang naglimpyo sa Sitio Dauis, Barangay San Roque, diin, kalit nga miduol ang mga suspek ug miilog sa tablet device sa biktima.
Misukol pa ang inahan gamit ang silhig apan nasamdan sa panagbuno, samtang ang iyang anak giingong giapas ug nasamdan usab sa insidente human gituhong gituslok og ice pick sa suspek.
Gipasalamatan sa lokal nga gobyerno ang paspas nga aksyon sa kapolisan ug ang kooperasyon sa komunidad nga nakatabang sa dayon nga pagdakop sa usa sa mga suspek.
Gipasabot usab sa alkalde nga dili nila pasagdan ang mga suspek ug pasalig nga magpadayon ang operasyon hangtod makompleto ang pagdakop sa tanang responsable.
