CEBU CITY-Gipasabot sa tigpamaba sa Department of Health-Central Visayas nga ang mga ihap sa COVID-19 cases sa DOH-Central Office mao ang mga ‘raw data’ nga nagagikan sa nagkadaiyang testing center sa Pilipinas.
Matud ni Dr. Mary Jean Loreche sa dihanhg nahinabi sa Bombo Radyo Cebu sa tulumanong Bombohanay Bigtime, nga ang tanang molecular laboratory ang adunay cut off matag adlaw nga ilahang ipadala sa Epidemiology Bureau sulod sa 24 oras.
Kini ang gibutyag ni Dr. Loreche human sa nabantayan nga dili sa gihapon magkatakdo ang ihap sa mga kaso sa COVID-19 sa DOH 7 ingon man sa DOH Central Office. Sigon pa sa tigpamaba nga nag-agad lang usab sila sa mga numero nga isumitir sa ilahang buhatan.
Gitataw ni Loreche nga sa ilahang panagpulong, ilahang natuki ang pag-streamline sa tanang data arun nga magkatakdo na ang ilahang mga numero.Gani, giingong sugyot pa niini nga kinahanglan nga i-agi una sa Regional Epidemiology and Surveillance Unit (RESU) ang tanang test results sa nagkadaiyang testing center ug sila na ang musumitir niini ngadto sa Epidemiology Bureau sa Central Office.
Gisiguro ni Dr. Loreche nga makab-ot lang gayud ang usa ka desisyon nga maghatag ug tukma ug nagtakdo nga report gikan sa Rehiyon 7 ug DOH Central Office. | SBR
